Le me’ Caséle

Avaria volù parlarve, stasera, dei bei tempi contadini dela tera, tra campi arè e nespole nela paja.

Avaria volù parlarve dele stagioni e del riposo del’inverno soto el giazo e la neve, fin ai tempi dela vendemia e del mosto pestà dai piè de butele bele...

...e inveze no.

Ho cambià la storia par essar più darente al me sentir...

Ho ciapà in man un libro... un libro che conta, tra foto e discorsi, de quela che l’è sta la me contrada...

Mi s’era picenina quando i m’ha portà via, na butina... ma me ricordo qualche nome e anca qualche facia e girando ste pagine de foto vecie, compagnè dala storia de sta gente che poco me ricordavo e manco ancora ghe ne savea, me son trovà orgogliosa e fiera: fiera de essar “una de lori”...

El Bepi marangon, la Dorina (el gazzetin dela padania) che la me tolea in giro parchè mi, neoda dela maestra, parlavo solo in italian: “vuto armili o albicocche stamatina, cara le me butina?”, e la Geppa col baston levà al ciel; la Delia, la Fina, la Mercede co sti nomi messi in fila: tre sorele..., la Maria carabiniera , el Moro galaran coi so momoni, el Lino coi so’ saladi e la Nori (che la strìa: la m’ha vardà in di oci e prima ancora che el savesse mì la s’avea bela incorta che mi spetavo fioi!), e persone, come se dise,”de prestigio”: architeti, dotori, pitori e artisti... gente che l’è deventà importante, ma con na dote piussè granda: anca da lontan, la dove i è rivadi, no i s’ha mai desmentegà da indo’ i è vignui...

Sta roba, a mi, la m’ha dato da pensar.

Mi vardavo ste pagine e ste foto de na vita che avea molà che s’era proprio picenina...ghe tornavo ciare olte, a saludar la nona, el Bepi e anca la Fina. Me parea distante... tuto ormai desmentegà... na vita che no’ l’è mia la mia.

Ma facia dopo facia, nome dopo nome me so incorta pian pianin che lì l’è restà casa mia... Che come quei siori che j é deventé importanti, che j ha passà la guera e tuti i so tormenti, che j é sté nela Cità Eterna e qualchedun anca più in là, fin a basar la Merica, anca mi son nata lì, fra chele campagne e chele scavezzagne, con la campana dela cesa che a pasqua la sona a festa. ...che no se pol andar distante se no’ se sà da in dò se vien...

E ho capìo... (ela sta n’iluminazion?) ...ho capìo che no’ esiste progresso, futuro e grandi robe se se desmenteghemo ci semo, da indo’ vignemo, se no se ricordemo che j’é le raìse, le raìse sane e vere, che ne permete de deventar grandi, de deventar gente che fa vedar le so’ doti e le so’ virtù, se se desmenteghemo che l’è proprio nela tera che se mete ste raìse...

...ma la tera...no l’è mia solo el nostro ortesel, la nostra campagna, la nostra contrada... la tera, el mondo, l’è dapartuto e no’ se pol, no’ se deve!, desmentegarse che l’è na s- cianta de tuti nojaltri , che tuti nojaltri g’aven da curarse, spartendose la fadiga, l’è giusto!, che la tera in do’ gaven le nostre raìse la sia sana, proteta, curà...insoma amà!